महाराष्ट्र राज्य क्रीडा आणि युवक सेवा संचालनालय अंतर्गत जिल्हा क्रीडा अधिकारी कार्यालय, सिंधुदुर्ग द्वारा सन 2023-24 चा सिंधुदुर्ग जिल्हा पुरुष गुणवंत खेळाडू पुरस्कार सावंतवाडी येथील आयुष दत्तप्रसाद पाटणकर याला जाहीर झाला आहे. येत्या स्वातंत्र्यदिनी सिंधुदुर्गाचे पालकमंत्री आणि राज्याचे सार्वजनिक बांधकाम मंत्री रविंद्र चव्हाण यांच्या हस्ते सिंधुदुर्गनगरी येथे आयुष याला हा पुरस्कार समारंभपूर्वक प्रदान केला जाणार आहे.

      राज्यस्तरीय नेमबाजी स्पर्धेत आयुष याने प्रथम क्रमांक मिळवित सुवर्ण पदक मिळवून भोपाळ येथे झालेल्या राष्ट्रीय स्पर्थेसाठी महाराष्ट्र राज्याचे नेतृत्व केले होते. राज्यस्तरीय स्पर्धेत आयुष याला 400 पैकी 378 गुण मिळाले होते. यापूर्वी दिल्ली आणि भोपाळ येथे झालेल्या शूटींग असोसिएशनच्या स्पर्धेत आयुष हा राष्ट्रीय खेळाडू म्हणून घोषित झाला आहे. महाराष्ट्र शासनाने महाराष्ट्र ऑलिम्पिक असोसिएशनसह महाराष्ट्र राज्य ऑलिंपिक खेळ आयोजित करण्याचा निर्णय घेतला. ज्यामुळे राज्यातील खेळाडूंना प्रोत्साहन आणि व्यासपीठ निर्माण होईल. घेण्यात येणाऱ्या विविध खेळांमध्ये नेमबाजी या खेळाचाही समावेश करण्यात आला आहे. या स्पर्धेत आंतरराष्ट्रीय खेळाडू अंजली भागवत, तेजस्विनी सावंत या सहभागी झाल्या होत्या. यातून सिंधुदुर्ग जिल्ह्यातील कु. आयुष दत्तप्रसाद पाटणकर याची 10 मीटर एअर पिस्तूल या क्रीडा प्रकारासाठी ऑलिम्पिक गेम्ससाठी निवड झाली करण्यात आली होती. या प्रकारात एकूण 49 पुरुष व 36 महिला असे एकूण 85 खेळाडूंची निवड करण्यात आली होती. यामध्ये अंजली भागवत, तेजस्विनी सावंत यासारखी आंतरराष्ट्रीय दर्जाच्या खेळाडूंसोबत आयुषची निवड होणे ही नक्कीच कौतुकास्पद बाब म्हणावी लागेल. ही स्पर्धा बालेवाडी, पुणे येथे घेण्यात आली होती. यापूर्वी आयुषने भोपाळ येथे झालेल्या राष्ट्रीय नेमबाजी स्पर्धेमध्ये 600 पैकी 563 गुण मिळवून भारतीय निवड चाचणीसाठी आपली पात्रता सिद्ध केली होती. याच निकषावर त्याची महाराष्ट्र ऑलिम्पिक स्पर्धेसाठी निवड झाली होती. सावंतवाडी येथील उपरकर शूटिंगचे कांचन उपरकर यांचे त्याला मार्गदर्शन लाभले होते. त्याच्या या यशाबद्दल त्याचे सर्व स्तरावर कौतुक केले जात आहे.