वेंगुर्ला नगरपरिषद निवडणूक 2025च्या पाश्र्वभूमीवर कायदा व सुव्यवस्थेचा आढावा घेऊन 13 नोव्हेंबर रोजी वेंगुर्ला पोलीस ठाण्याच्या हद्दीत मॉब डिस्पर्सल व दंगा काबू योजना (पथ संचलन) राबविण्यात आली. या उपक्रमाचे मार्गदर्शन सावंतवाडी उपविभागीय पोलीस अधिकारी विनोद कांबळे यांनी केले. त्यांच्या उपस्थितीत पोलीस दलाने शहरात पथ संचलन केले. यात वेंगुर्ला बाजारपेठ, मारूती स्टॉप परिसर, गाडीअड्डा, दाभोली नाका व शिरोडा नाका या प्रमुख ठिकाणांचा समावेश होता. नागरिकांमध्ये निवडणूक काळात सुरक्षिततेची भावना निर्माण करण्यासाठी व कायदा सुव्यवस्थेचा संदेश देण्यासाठी हे संचलन करण्यात आले. या संचलनात पोलिस निरीक्षक निसर्ग ओतारी यांच्यासह 3 पोलीस अधिकारी, 20 पोलीस अंमलदार, 1 आर.सी.पी. प्लाटून तसेच 10 होमगार्ड सहभागी झाले होते. निवडणूक काळात कुठलीही अनुचित घटना घडू नये म्हणून पोलीस प्रशासन सतर्क आहे, असे यावेळी पोलिस निरीक्षक निसर्ग ओतारी यांनी सांगितले.