वेंगुर्ला नगरपरिषदेची सभा २२ डिसेंबर रोजी नगराध्यक्ष दिलीप गिरप यांच्या अध्यक्षतेखाली छत्रपती शिवाजी महाराज सभागृहात संपन्न झाली. यावेळी उपनगराध्यक्ष अस्मिता राऊळ, नगरसेवक प्रशांत आपटे, सुहास गवंडळकर, धर्मराज कांबळी, प्रकाश डिचोलकर, दादा सोकटे, शितल आंगचेकर, कृतिका कुबल, श्रेया मयेकर, कृपा गिरप-मोंडकर, स्नेहल खोबरेकर, पूनम जाधव, सुमन निकम, मुख्याधिकारी अमितकुमार सोंडगे, प्रशासकीय अधिकारी संगिता कुबल व विविध खात्याचे अधिकारी उपस्थित होते. मागील सभेत नगरसेवक संदेश निकम यांनी नगरपरिषद अभियंता यांच्याशी केलेल्या गैरवर्तनाविषयी अधिकारी वर्गाने पत्राद्वारे त्यांच्या विरोधात कारवाईची मागणी केली होती. त्यासंदर्भात नगराध्यक्ष दिलीप गिरप यांनी यावेळी त्यांना समज देऊन माफ केले असल्याचे सांगत यापुढे असे वर्तन घडणार नाही याची खबरदारी घ्यावी असे सभागृहात स्पष्ट केले.
नूतन मच्छीमार्केटच्या विद्युतीकरणाचे काम शिल्लक असून ते तात्काळ सुरु करुन प्रजासत्ताकदिनी मच्छीमार्केटचे उद्घाटन करण्याचे ठरविण्यात आले. लॉकडाऊन काळात कंपोस्ट डेपोतील कोळसाकांडी प्रकल्प बंद ठेवण्यात आल्याने त्यांना ९ कामगारांचे वेतन व इतर खर्च असे एकूण साधारण १५ लाख रुपये खर्च झाला. त्यामुळे त्यांना या काळात आलेल्या विज बिलात सवलत मिळण्याची मागणी त्यांनी सभागृहात केली. यावर एकूण विज बिलापैकी १ लाख रुपये भरुन ३१ मार्चपर्यंत मुदत वाढ देण्यात आली. तर एप्रिल २०२१ पासून नविन भाडेकरार करण्यात येणार आहे. निशाण तलाव धरणाचे काम सुरु असल्याने आणि संभाव्य पाणी टंचाई लक्षात घेऊन शहरात २ दिवस आड पाणी पुरवठा करण्याचे ठरविण्यात आले. तसेच नागरिकांकडून होत असलेला पाण्याचा अपव्यय टाळण्यासाठी जनजागृती करुन प्रसंगी दंडात्मक कारवाई करण्याच्या सूचना दिल्या. शहरात सध्या ज्याठिकाणी पाईपलाईनचे काम सुरू आहे त्याठिकाणी पाण्याची व्यवस्था करण्यात येणार असल्याची माहिती पाणीपुरवठा कर्मचारी सागर चौधरी यांनी दिली.
स्वच्छ भारत अभियान अंतर्गत मॉड्युलर टॉयलेटसाठी नगरसेवकांनी आपल्या भागातील ठिकाणे निश्चित करण्याच्या सूचना दिल्या. उपनगराध्यक्ष अस्मिता राऊळ यांनी कंपोस्ट डेपोतील दुर्गंधीबाबत नाराजी व्यक्त केली. आमदार केसरकर यांच्या प्रयत्नातून पाणबुडी प्रकल्पाच्या ऑफिससाठी टेलिफोन ऑफिसच्या जवळील जागेत उभारण्यासाठी परवानगी दिली. दर शनिवारी नगरसेवकांसह आपण स्वतः शहरात स्वच्छता मोहिम राबविण्यात येणार असल्याची माहिती नगराध्यक्ष यांनी दिली.