सुंदरभाटले येथील श्रीदेव वांद्रेश्वर देवस्थानाचा वार्षिक उत्सव ५ मार्च रोजी मोठ्या भक्तिभावाने साजरा झाला. यावेळी श्रीसत्यनारायणाची महापूजा व रात्रौ पार्सेकर दशावतार नाट्य मंडळाचे ‘नर्मदा मागे का फिरली?‘ हा विशेष नाट्यप्रयोग सादर झाला. यावेळी बहुसंख्य नाट्यरसिक उपस्थित होते. या नाटकाच्या प्रारंभी पार्सेकर दशावतार नाट्य मंडळात गेले २५ वर्षे एकाच मंडळात राहून रंगभूमीची सेवा करणारे आणि आपल्या उत्कृष्टअभिनयाच्या जोरावर दशावतारी क्षेत्रात नाव मिळविलेले बाबा कामत यांना गौरविण्यात आले. वेंगुर्ला तालुका पुरवठा अधिकारी वाडेकर यांच्या हस्ते श्री.कामत यांचा शाल, श्रीफळ व रोख रक्कम देऊन सत्कार करण्यात आला. यावेळी वांद्रेश्वर मंडळाचे दादा सोकटे, अजित कनयाळकर, विनय गोगटे, ज्येष्ठ दशावतारी कथा लेखक भाऊ भगत, रामेश्वर दशावतार मंडळाचे संचालक भैय्या गुरव यांच्यासह मंडळाचे पदाधिकारी उपस्थित होते. तसेच दशावतार आणि पत्रकार क्षेत्रातील उल्लेखनीय योगदानाबद्दल भैय्या गुरव यांनाही सन्मानीत करण्यात आले. विशेष सत्कारमूर्ती बाबा कामत यनी सत्काराबद्दल मंडळाचे आभार मानले.