सिंधुदुर्ग विद्यानिकेतन इंग्लिश मिडियम स्कूल, वेंगुर्ला येथे वार्षिक स्नेहसंमेलनाचे औचित्य साधून विज्ञान प्रदर्शन भरविण्यात आले होते. उद्घाटन सिंधुदुर्ग जिल्ह्याचे नियोजन अधिकारी यशवंत बुधावळे आणि संत राऊळ महाराज कॉलेज कुडाळच्या प्राचार्या डॉ. स्मिता सुरवसे यांच्या हस्ते करण्यात आले.
या प्रदर्शनात शाळेतील विद्यार्थ्यांनी विविध वैज्ञानिक संकल्पनांवर आधारित नाविन्यपूर्ण वैज्ञानिक प्रतिकृतींचे सादरीकरण केले. यावेळी पदार्थ विज्ञान या विषयाच्या पीएच.डी केलेल्या प्राचार्य डॉ.स्मिता सुरवसे यांनी विद्यार्थ्यांना विचारलेल्या प्रश्नांना त्यांनी अभ्यासपूर्ण उत्तरे दिली. विद्यार्थ्यांची प्रगती पाहून प्राचार्य सुरवसे यांनी विद्यार्थी व शिक्षकांचे कौतुक केले. या प्रदर्शनासाठी शाळेतील चारही विद्यार्थी गटांना विषय विभागून देण्यात आले होते. ५वी ते ७वी गटासाठी माहिती तंत्रज्ञान, जलसंधारण, गणित प्रतिकृती व टाकाऊपासून टिकाऊ हे चार गटांसाठी चार विषय तर ८वी ते १० वी गटासाठी चुंबकत्व, उष्णता, प्रकाश व उपग्रह तंत्रज्ञान हे चार विषय देण्यात आले होते. प्राथमिक गटातील सिया गावडे, पृथ्वीराज सावंत, आयुष नार्वेकर, ऋग्वेद तुळसकर यांच्या यलो हाऊस गटाने सादर केलेल्या जलसंधारणावर आधारित प्रतिकृतीला तसेच माध्यमिक गटातील ओम दीपनाईक, स्वदीप उकिडवे, मनोहर गावडे यांच्या ब्ल्यू हाऊस गटाने तर भूषण नाईक, वेद पाटील, क्रिस्टन डिसोझा व अथर्व पारकर यांच्या ग्रीन हाऊस गटाने प्रथम क्रमांक पटकाविला. यावेळी उपाध्यक्ष इर्शाद शेख, सचिव आनंद परूळेकर, संचालक प्रशांत नेरूरकर, मुख्याध्यापिका मनिषा डिसोजा, शाळेचे सर्व शिक्षक, शिक्षकेत्तर कर्मचारी व विद्यार्थी उपस्थित होते. सूत्रसंचालन विज्ञान शिक्षिका स्वाती आजगावकर यांनी तर परीक्षण विज्ञान शिक्षक गजानन पालयेकर व नितीन कुलकर्णी यांनी केले.