रेडी-शिरोडा भागाचा पर्यटनदृष्ट्या विकास होण्याच्या दृष्टीने रेडी यशवंतगड समुद्रकिनारा ते शिरोडा समुद्रकिनारी झुलता पूल होणे गरजेचे आहे. या पुलाच्या कामास मंजुरी मिळून कामासाठी शासनाने निधी उपलब्ध करुन द्यावा अशी मागणी पंचक्रोशीतील ग्रामस्थांच्यावतीने सिंधुदुर्ग जि.प.चे माजी शिक्षण व आरोग्य सभापती प्रितेश राऊळ यांनी बंदर विकास मंत्री तथा पालकमंत्री नितेश राणे यांच्याकडे निवेदनाद्वारे केली आहे. हे निवेदन आमदार दीपक केसरकर आणि आमदार निलेश राणे यांनी देण्यात आले असून पंचक्रोशीतील ग्रामस्थांच्या मागणीनुसार या पुलाच्या कामास या अधिवेशनात मंजुरी मिळून निधी उपलब्ध करून द्यावा अशी आग्रही मागणी करण्यात आली आहे.
शिरोडा पॅराडाईज बीच हे पर्यटनाचे खास आकर्षण आहे. येथे ताजचा पंचतारांकित हॉटेल प्रकल्प उभा राहणार आहे. तसेच माऊली मंदिर, पांडवकालीन गणपती मंदिर, यशवंत गडकिल्ला, पांडवकालीन हत्तीचे सोंड, रेडी तलाव, सिद्धेश्वर मंदिर, दक्षिणाभीमुख हनुमान मंदिर अशी विविध धार्मिक स्थळे आणि पर्यटन स्थळे आहेत. म्हणूनच या भागात अनेक देशी-विदेशी पर्यटक, भाविक भक्त, शिवप्रेमी याचा आस्वाद घेण्यासाठी शिरोडा-रेडी भागात भेट देत असतात.
यशवंत गड किल्ल्याच्या पायथ्याशी समुद्र आणि खाडीचा संगम आहे आणि त्याच्यापलिकडे शिरोडा हे प्रसिद्ध गाव आहे. तेथे मिठाचा सत्याग्रह झालेले आणि स्वातंत्र्याची साक्ष देणारे मिठागरे आहे. समुद्र किनारा आणि खाडीचा संगम ह्या सुंदर ठिकाणी रेडी यशवंत गड आणि शिरोडा वेळागर समुद्र किनारा जोडणारा झुलता फुल झाल्यास खया अर्थाने तो या भागासाठी पर्यटन सेतू ठरू शकतो. पर्यटकांना, शिवप्रेमींना, भाविकांना शिरोडा वेळागरावरून भ्रमंती करत रेडी यशवंत गड येथे येण्यास सुलभ होणार आहे. तसेच स्थानिक युवकांना छोटी छोटी दुकाने उभी करून त्यांना रोजगार उपलब्ध होणार आहे.
दरम्यान, प्रशासनस्तर उपसचिव पर्यटन विभागकडे हा प्रस्ताव थांबलेला आहे. २०२४ मध्ये तत्कालीन सार्वजनिक बांधकाम मंत्री रवींद्र चव्हाण यांनी या कामाला शिफारस दिली होती. तरी मंत्रालय स्तरावर पाठपुरावा करून सदर झुलता पुलासाठी शासनाने मंजुरी देऊन निधी उपलब्ध करून द्यावा अशी मागणी होत आहे.