जम्मू काश्मिरच्या पहलगाम येथे झालेल्या अतिरेकी हल्ल्याच्या पार्श्वभूमीवर केंद्र सरकारने खबरदारीचा उपाय म्हणून देशभरातील महत्त्वाच्या शहरांमध्ये युद्धजन्य परिस्थितीची ऑपरेशन अभ्यास रंगीत तालीम (मॉक ड्रील) घेण्याचा निर्णय घेतला होता. महाराष्ट्रातील १६ ठिकाणांचा यात समावेश होता. या १६ ठिकाणांमध्ये सिधुदुर्ग जिल्ह्याचाही समावेश असल्याने ७ मे रोजी संपूर्ण जिल्ह्यात दुपारी ४ वाजता मॉक ड्रिल घेण्यात आले. यावेळी वेंगुर्ला शहरातही या मॉक ड्रिलचे प्रात्यक्षिक घेण्यात आले. दुपारी ४ वाजता आवाज वरखाली होणारा भोंगा वाजवून नागरिकांना सतर्क करण्यात आले. यावेळी पोलिस, नगरपालिका प्रशासन यांच्यामार्फत संपूर्ण बाजारपेठ निमर्नुष्य करून नागरिकांना सुरक्षितस्थळी जाण्याच्या सुचना देण्यात आल्या. यावेळी आरोग्य यंत्रणा, अग्निशमन दल, रूग्णवाहिका सज्ज होत्या. यावेळी बाजारपेठेत पोलिस निरीक्षक संदिप भोसले, मुख्याधिकारी हेमंत किरूळकर यांच्यासहीत अधिकारी कर्मचारी उपस्थित होते. नागरिकांनीही या मॉकड्रिलला प्रतिसाद दिला.