वीस हजार लोकसंख्येखालील गटात राज्यात तृतीय, तर देशात पंधरावा क्रमांक

      वेंगुर्ले नगर परिषदेला स्वच्छ सर्वेक्षण 2024 मध्ये 20 हजारापेक्षा कमी लोकसंख्या गटातील कामगिरीनुसार कोकण विभागात प्रथम, राज्यात तृतीय, तर देशात पंधरावा क्रमांक प्राप्त झाला आहे. महाराष्ट्रामधील सर्व महानगरपालिका, नगर परिषदा व नगर पंचायतीमध्ये संपूर्ण महाराष्ट्रात 14 वा क्रमांक प्राप्त झाला आहे. तसेच वेंगुर्ले शहरास जीएफसी 1 स्टार व ODF ++ मानांकन प्राप्त झाले आहे. त्यामुळे वेंगुर्ले नगर परिषदेचे सर्व स्तरातून अभिनंदन होत आहे.

      वेंगुर्ले नगर परिषदेमार्फत घरोघरी 100% विलगीकृत कचऱ्याचे संकलन केले जाते. या विलगीकृत कचऱ्याचे नगर परिषदेच्या स्वच्छ भारत पर्यटनस्थळ (कंपोस्ट डेपो) येथे विविध 27 प्रकारात वगकरण केले जाते. संकलित करण्यात आलेल्या ओल्या कचऱ्यावर प्रक्रिया करून बायोगॅस निर्मिती तसेच जैविक खत निर्मिती केली जाते. सुक्या कचऱ्याचे उपयोगानुसार विविध प्रकारात वगकरण करून त्याची विक्री केली जाते. शहरातील बाजारपेठ, मुख्य रस्ते या ठिकाणी नियमितपणे स्वच्छता करण्यात येते. शहरातील सार्वजनिक शौचालयांची नियमितपणे देखभाल दुरुस्ती करून स्वच्छता राखण्यात येते. शहरातील गटारांची नियमितपणे स्वच्छता करण्यात येते. शहरामध्ये सांडपाणी व मैलापाणी व्यवस्थापन चांगल्या पद्धतीने केले जाते.

      स्वच्छ सर्वेक्षण कालावधीमध्ये वेंगुर्ले नगर परिषदेमार्फत पुढीलप्रमाणे विविध उपक्रम राबविण्यात आले. यात प्लास्टिक निर्मूलन पथक स्थापन करण्यात आले व त्यामार्फत नियमितपणे सिंगल युज प्लास्टिक वापरणाऱ्या नागरिक व व्यापाऱ्यांवर दंडात्मक कारवाई करण्यात आली. तसेच शहरामध्ये प्लास्टिक बंदीबाबत माहिती फलक, भित्तीचित्रे, पथनाट्याद्वारे जनजागृती करण्यात आली. नियमितपणे शहरातील विविध ठिकाणी स्वच्छता मोहीम राबविण्यात आल्या तसेच शहरातील शाळा व महाविद्यालयांमध्ये स्वच्छताविषयक विविध प्रकारच्या स्पर्धा व कार्यशाळा आयोजित करण्यात आल्या.

      नगर परिषदेचे सर्व अधिकारी, कर्मचारी, शहरातील विविध पदाधिकारी व नागरिक यांच्या सहाय्याने अनेक ठिकाणी साफसफाई करण्यात आली. तसेच दर महिन्याला मांडवी येथे कांदळवन स्वच्छता अभियान राबविण्यात आले.

      वर्षभरात विविध ठिकाणी आयोजित करण्यात येणाऱ्या स्वच्छता मोहीम, स्वच्छता जनजागृतीपर विविध कार्यक्रम यामध्ये स्वच्छताप्रेमी वेंगुर्लावासीयांचा मिळणारा उत्स्फूर्त सहभाग या सर्वामुळे नगर परिषदेला स्वच्छ सर्वेक्षण अभियानामध्ये घवघवीत यश प्राप्त झाले आहे. आतापर्यंत वेंगुर्ले नगर परिषदेला स्वच्छ सर्वेक्षणामध्ये विविध पुरस्कार प्राप्त झाले असून मुख्याधिकारी, माजी लोकप्रतिनिधी, अधिकारी, कर्मचारी, स्वच्छता कर्मचारी व नागरिक यांच्या सहकार्यातून हे यश प्राप्त झाले आहे, असे मुख्याधिकारी हेमंत किरुळकर यांनी सांगितले.