कोकण कला व शिक्षण विकास ही सेवाभावी संस्था गेली अनेक वर्षे सिंधुदुर्गात नव्हे तर महाराष्ट्रात कार्यरत असून विविध शालोपयोगी उपक्रम राबवीत असतात. यावर्षीही सिंधुदुर्ग जिल्ह्यातील १९ शाळांना संस्थेच्यावतीने कमर्शियल वॉटर फिल्टर देण्यात आले. त्यापैकी वेंगुर्ल्यातील एका महाविद्यालयाला तसेच चार हायस्कूलना वॉटर फिल्टर देण्यात आले. दरम्यान, वेंगुर्ला हायस्कूलला देण्यात आलेल्या वॉटर फिल्टरचा शुभारंभ माजी मुख्याध्यापक एस.एस.काळे व माजी विद्यार्थी प्रसन्न देसाई यांच्या हस्ते करण्यात आला. यावेळी मुख्याध्यापक पी.डी.कांबळे, आर.डी.केर्लेकर, एस.आर.कुरणे, एस्.एल.समुद्रे, एन.आर.तेंडोलकर, ए.व्ही.तेंडोलकर, आर.एस.कांबळे तसेच विद्यार्थी उपस्थित होते.
सिंधुदुर्ग जिल्ह्यातील ग्रामीण भागातील शाळांमधील शिक्षण घेणाया विद्यार्थ्यांना स्वच्छ पाणी मिळावे यासाठी कोकण विकास संस्थेने आयजीयुस इंडिया या कंपनीच्या सहकार्याने राबविलेला उपक्रम स्तुत्य असून या उपक्रमामुळे शाळेतील मुलांचे आरोग्य सुधारण्यास मदत होईल. रोगप्रतीकारशक्ती वाढेल व शालेय उपस्थितीत सकारात्मक बदल दिसून येईल, असे प्रसन्ना देसाई यांनी सांगत कोकण विकास संस्थेचे अध्यक्ष दयानंद कुबल यांचे आभार मानले. विद्यार्थ्यांची शुद्ध पाण्याची सोय करून दिल्याबद्दल कोकण कला व शिक्षण विकास संस्थेचे मुख्याध्यापक पी.डी.कांबळे आभार मानले.