नवीन शैक्षणिक धोरणानुसार सर्व महाविद्यालयांना इतर संस्थांशी जोडले राहणे आवश्यक आहे, विद्यार्थ्यांना अधिकाधिक चौफेर ज्ञान मिळवून देण्याच्या दृष्टीने मोठ्या राष्ट्रीय स्तरावरील संस्थांसोबत विविध उपक्रम राबविण्याच्या दृष्टीने स.का.पाटील सिंधुदुर्ग महाविद्यालयाने पनवेल येथील महात्मा एज्युकेशन सोसायटीच्या पिल्लाई इन्स्टिट्यूट ऑफ मॅनेजमेंट स्टडीज अँड रिसर्च सोबत पुढील तीन वर्षांसाठी सामंजस्य करार केला आहे. यातून विद्यार्थ्यांना व शिक्षकांना अध्ययन, अध्यापनाच्या विविध नाविन्यपूर्ण संधी होणार आहेत. यामध्ये सिमुलेशन गेम्स वर्कशॉप, कम्युनिकेशन स्किल्स वर्कशॉप, एक्सपर्ट सेशन्स, गेस्ट लेक्चर्स, सेमिनार, ट्रेनिंग सेशन या बाबींचा समावेश आहे. हा करार म्हणजे शैक्षणिक प्रगतीमधील एक मोठे पाऊल आहे, असे मत प्राचार्य डॉ. शिवराम ठाकूर यांनी व्यक्त केले. इन्स्टिट्यूटच्या प्राचार्यांच्यावतीने प्रा.अभिमन्यू रॉय यांनी व प्राचार्य डॉ.ठाकूर यांनी करारावर सह्या केल्या. यावेळी आयक्यूएसी कोऑर्डिनेटर डॉ.सुमेधा नाईक, डॉ.उज्ज्वला सामंत व कार्यालय अधिक्षक कैलास साळुंखे हे उपस्थित होते.