पोषक तत्त्वांच्या कमतरते व्यतिरिक्त त्यांच्या पिकांवर परिणाम करणाऱ्या कीड आणि रोगांचे योग्य व्यवस्थापन करण्यासाठी शेतकऱ्यांना तज्ज्ञांच्या सल्ल्याची गरज असते. या पार्श्वभूमीवर भारतीय कृषी संधोधन परिषद अंतर्गत काजू संशोधन संचालनालय पुत्तूर यांनी काजू पिकासाठी कृत्रिम बुद्धिमत्ता (एआय) तंत्रज्ञानावर आधारित ॲप्स आणि वेबसाईटची निर्मिती केली आहे.

      वेबसाईट व ॲपवर अपलोड केलेल्या प्रतिमांमधून त्वरित सुमारे 60 काजू, 20 रोग आणि 10 अन्नद्रव्ये तत्वांची कमतरता यांचे निदान करु शकता. यासाठी सर्वप्रथम गुगल प्ले स्टोअरमध्ये जाऊन काजू सुरक्षा ॲप (कॅश्‍यू प्रोटेक्ट ॲप) डाऊनलोड करावयाचा आहे. त्यानंतर आपले नाव, पत्ता, मोबाईल नंबर व ईमेल आयडी टाकून नोंदणी करावी. हे ॲप 11 प्रादेशिक भाषेत असून आपल्याला हव्या असलेल्या भाषेचा वापर करु शकता. येथे आपण मोबाईलद्वारे काढलेले फोटो अपलोड करुन आपल्या बागेत असणाऱ्या कीड, रोग व पोषण कमतरतेच्या अभाव यांचे निदान करु शकता. यासाठी प्रादेशिक फळ संशोधन केंद्र, वेंगुर्ला येथील कीटक शास्त्रज्ञ व हॉर्टसॅप काजू प्रकल्प अन्वेषक डॉ.विजयकुमार देसाई व संशोधन सहयोगी हॉर्टसॅप प्रकल्पाचे डॉ.गोपाळ गोळवणकर यांनी राज्यातील काजू उत्पादक शेतकऱ्यांनी या तंत्रज्ञानाचा जास्तीत जास्त वापर करावा असे आवाहन केले आहे.

      दरम्यान, हे ॲप्स आणि वेबसाईट वापरकर्त्यांना काजू लागवडीच्या समस्यांचे कुशलतेने व्यवस्थापन करण्यास सक्षम करेल, ज्यामुळे उत्पादन आणि उत्पादकता वाढेल असा विश्वास व्यक्त केला आहे.