गणित विषयाचे प्रसिद्ध तज्ज्ञ शिक्षक व आसोली हायस्कूलचे निवृत्त मुख्याध्यापक रमण किनळेकर यांनी लिहिलेल्या ‘गणित मुलभूत कौशल्ये‘ या गणित विषयक पुस्तकाचे प्रकाशन १९ ऑक्टोबर रोजी आसोली हायस्कूल येथे झाले. यावेळी व्यासपिठावर माजी गटशिक्षणाधिकारी रमेश पिगुळकर, उद्योजक पुष्कराज कोले, आसोली ग्रामविकास संस्थेचे अध्यक्ष विष्णू उदय धुरी, मुख्याध्यापक विष्णू रेडकर, शिक्षिका भावना आवळे, माजी शिक्षक सुरेश शिरोडकर, माजी मुख्याध्यापिका विशाखा वेंगुर्लेकर, सुरेश धुरी, विजय धुरी, झिलू घाडी, वर्षा किनळेकर, रेश्मा पिगुळकर, एकनाथ पिगुळकर आदी उपस्थित होते.

      या पुस्तकात सुमारे ३७ स्वाध्याय असून गृहपाठ म्हणून विद्यार्थ्यांना सोडवायला तसेच आठवीपर्यंत शिकणा-या विद्यार्थ्यांना स्वयंअभ्यास म्हणून वापरता येणार आहेत. संख्यावरील मुलभूत क्रिया बेरीज, वजाबाकी, गुणाकार व भागाकार अपूर्णांक, दशमान अपूर्णांक क्रियांचा क्रम, घातांक, असमानता, मसावि-लसावि, बैजिक राशी, दैनंदिन जीवनातील निगडीत घटक आणि महत्त्वपूर्ण उपयुक्त गणितातील उच्चस्तरीय गणिती पाया या पुस्तकात अंतर्भूत केला आहे.