ऑनलाईन शिक्षणामुळे विद्यार्थ्यांना मोबाईल द्यावा लागला. परिणामी, मुलांच्या डोळ्यावर त्याचा परिणाम झाला आहे. हीच बाब लक्षात घेऊन हातभार चॅरिटेबल ट्रस्ट सिंधुदुर्ग या संस्थेच्यावतीने सामाजिक बांधिलकी जोपासण्याचा प्रयत्न करताना २१ जून रोजी पाटकर हायस्कूलमधील विद्यार्थी, शिक्षक व पालकांसाठी नेत्र तपासणी शिबिर घेण्यात आले. उद्घाटन पोलिस निरीक्षक अतुल जाधव यांच्या हस्ते झाले.
मुख्याधिकारी परितोष कंकाळ यांनी शिबिरास भेट देऊन उपक्रमाचे कौतुक करून संस्थेला नगरपरिषदेच्यावतीने सर्वोतोपरी मदत करण्याचे आश्वासन दिले. यावेळी मुख्याध्यापक आत्माराम सोकटे, हातभार संस्थेचे संस्थापक अध्यक्ष शैलेश मयेकर, वासुदेव गावडे, एकनाथ चव्हाण, जिल्हाध्यक्ष संजय पिळणकर, जिल्हा सचिव यश माधव, शुभांगी ऑप्टिक्सचे निलेश हरमलकर व समीर हरमलकर, हातभार संस्थेचे वेंगुर्ला संफ प्रमुख प्रतिक खानोलकर, महिला संघटक अस्मिता भराडी, निखिल भराडी आदी उपस्थित होते.
यापुढेही हातभार हा ट्रस्ट सावंतवाडी, दोडामार्ग व वेंगुर्ला तालुक्यातील जास्तीत जास्त विद्यार्थ्यांची मोफत नेत्र तपासणी करून दृष्टीदोष असलेल्या विद्यार्थ्यांना मदत करणार असल्याचे जिल्हाध्यक्ष संजय पिळणकर व संस्थापक अध्यक्ष शैलेश मयेकर यांनी सांगितले. तर हातभार चॅरिटेबल ट्रस्टच्या माध्यमातून जिल्हाध्यक्ष संजय पिळणकर यांचे ‘‘मिशन २०००‘‘ ला संपूर्ण सहकार्य करण्याचे आश्वासन शुभांगी ऑप्टिक्सच्यावतीने सचिन हरमलकर यांनी दिले. सूत्रसंचालन व आभार शिक्षक महेश बोवलेकर यांनी केले.